Sindhudurg District Location

महाराष्ट्र राज्यात सिंधुदुर्ग जिल्ह्याचे स्थान

सिंधुदुर्ग जिल्ह्याचा नकाशा          

सिंधुदुर्ग जिल्हा

या जिल्ह्याची स्थापना रत्नागिरी जिल्ह्याचे विभाजन करून १ मे १९८१ रोजी झाली. हा जिल्हा महाराष्ट्र राज्यातील एक जिल्हा असून तो कोकण विभागात आहे. त्याच्या पश्चिमेस अरबी समुद्र असून पूर्वेस सांगली व कोल्हापूर  जिल्हे  आहेत. दक्षिणेस गोवा हे राज्य असून उत्तरेस रत्नागिरी जिल्हा आहे. कोकणातील हा सर्वात  दक्षिणेकडील जिल्हा आहे.

जिल्ह्यात सावंतवाडी,  कणकवली, कुडाळ, देवगड, दोडामार्ग, मालवण, वेंगुर्ला व वैभववाडी हे ८ तालुके आहेत. या जिल्ह्याच्या खास बोलीभाषा मालवणी व कुडाळी  आहेत.

या जिल्ह्याचे क्षेत्रफळ ५,२०७ चौ. किलोमीटर असून लोकसंख्या सन २०११ च्या शिरगणतीनुसार ८,४८,८६८ आहे. येथील पर्जन्यमान सुमारे ३२८७ मी. मी. आहे.

राजापूर हा एकमेव लोकसभा मतदारसंघ रत्नागिरी व सिंधुदुर्ग मध्ये विभागला असून येथून श्री निलेश नारायण राणे हे खासदार म्हणून निवडून आले आहेत. येथे श्री विरेंद्रसिंग हे जिल्हाधिकारी म्हणून कार्यरत आहेत. या जिल्ह्यात सावंतवाडी, कणकवली व कुडाळ हे विधानसभा मतदारसंघ आहेत. या जिल्ह्याचे पालकमंत्री मा . ना . श्री नारायणराव राणे आहेत.

हा जिल्हा पर्यटन जिल्हा म्हणून जाहीर झाला आहे. जिल्ह्याचा संपूर्ण परिसर हिरव्यागार वनश्रीने नटला असून नारळ, पोफळी व आंबे, काजूच्या बागा एकूण प्रदेशाला शोभा आणीत आहेत. पश्चिम किनारपट्टीला निळाशार समुद्र असून किनारपट्टी चंदेरी वाळूने  सजली आहे. पूर्वेला चढता भूभाग असून त्याला वलाटी   म्हणतात, तेथील सह्याद्री पर्वताच्या रांगा निसर्ग भ्रमंतीला साद घालतात.

ह्या जिल्ह्यात १७ क्रमांकाचा राजमार्ग मुंबई-गोवा महामार्ग म्हणून प्रसिद्ध असून मुंबई व  गोवा या जिल्ह्यातून जोडले गेले आहेत. कोकण रेल्वे या जिल्ह्यातून जात असून कणकवली, कुडाळ, ओरोस, सावंतवाडी ही महत्वाची ठिकाणे रेल्वेद्वारे जोडली गेली आहेत.